موسوعة الكلمات القديمة ومعانيها الحديثة

[نوارس]

بسم الله الرحمن الرحيم
اللهم صل على محمد وآل محمد وصحبه المنتجبين
السلام عليكم ورحمة الله وبركاته

جايب لكم اليوم موضوع حليييييييو بالحيييييييييل

وهو

موسوعة الكلمات القديمة ومعانيها الحديثة

شلون يعني

أقول لكم

كل واحد عنده كلمة قديمة يعرفها أو يقول حق والديه أو أجداده ويكتبها لنا هنا ويحط بجنبها معناها في الوقت الحاضر

ويالله همتكم معاي لنكون موسوعة لكلماتنا الأثرية حتى لا تندثر ويعرفها الأجيال القادمة

في أساس لهجاتنا كلامنا الذي نتناوله يومياً

يالله ياربوع البلاد لنضع لهجات البلاد بكلماتها هنا

ليستفيد منها الجميع

إن شاء الله الموضوع ينال على إعجابكم ورضاكم

وببتدي أنا أولاً

وإذا في تفاعل بحط الباقي لأن عند كلمات كثيرة جمعتها ممن أعرفهم

والسلام عليكم ورحمة الله وبركاته

[نوارس]

أشفيك منجعي و مكرفس
** أشفيك تعني أشعلامك أو ماذا دهاك – منجعي تعني قاعد عوج – مكرفس تعني مكسر مثل الثوب المكسر أو معلوج علج .
و عادة ما تنقال الا للشخص الي تمون عليه حيل لانه عادة ما ينجعي الشخص الا ماخذ راحته و لا مهتم بالي بجنبه من باب الميانه .

مثل : شرنققك
** شرنققك هو عبارة عن سؤال عن الحال ولكن فيها تمويه بعض الشئ لأنها من قسمين حرف الشين و رنققك الشين مختصرة من كلمة شلون أي كيف - الرنققك داله على الحالة والرنق كلمة مستعربه من الأنجليزي وهو الاطار يعني البرواز و من مرادفات شرنققك شلونك ، و شلون الأحوال ، شضروفك
و عادة تستخدم عن السؤال عن الحال أو الضروف . هوي كلمة متوحاه من عمال ارامكو أيام اول و عرفوا بعض الكلمات الإنجليزية و استعربوها

ظهريه يشخص عليه
** الظهر تعرفونه الي يصير ورى البطن
** يشخص يعني فيه الم او وجع
** عليه على الشخص المتكلم


ارمق الشفت
** ارمق يعني طالع
** الشفت هذا الشخص


معونة
** ويكون الرد عليها يعينه

معونة اي اعانك الله /الله يساعدك

يعينه
**اي اختصار لأعان الله الجميع /الله يساعدنا وياك/جميعاً


مدوده
** (واحد ما يدري وين الله حاطه فيه)

- زغيده
**يعني مشاجر ( مخانق )
***يعني لو سمعت واحد يقول قامت هناك الزغيده أعرف أن هناك مخانق .

- حوسه ولوسه
** حركه دايمه غير مستقره
*** مثال /
اشفيك في حوسه ولوسه وماتهجع ( طبعاً ( ما تهجع ) يعني ما تركد يعني ما تقعد يعني ما تجلس يعني سددآون ))

- خربوطه
** شي غير معروف أو مفهوم
*** مثال /
شفيك اليوم متخربط ومعفوس ( يعني / أنت اليوم حالتك غير مستقره )

الجصة <=-=- أهل الأحساء يقولونها
** وهي مكان يحطون فيه التمر أيام أول

هَــنـَاك العقلان <-=-=- أهل الرياض يقولونها
** معناها : قرت عينك

[نبع الوفاء]

يعطيك ربي العافية ..

تسلم والله ماقصرت على اداجك كل مفيد لنا ..

والله هذا الموضوع راائع ..

وأن شاء الله لنا عوده ..

تقبلي احترامي وتقديري...

[البلابل]

وضوع رائع ولكن اعطونا فرصة للبحث عن كلمات قديمة ومعانيها الحديثة
ترى الموضع تحدي
رايحه أنسع شعري أي رايحه أضفر شعري

[نوارس]

نبع الوفاء / مشرفتنا العامة
تشرفت بتواجدك هنا
وهالله هالله بالكلمات السنعه ( العدله ) ( الممتازة )

********************

البلابل
انتبهي على شعرك وجيبي لنا الحجي العدل المعطر بريح الماضي الخنين

بانتظاركم

[نوارس]

وهذه دفعة ثانية

- أم الفتل
** وهي للطبخ تعبأ بالجاز . تصلح حيل حق الكراعين والهريس وتعطي البيت ريحة أبيوت الأوليين ( ريحه خنينه ) .

- الهاون
** معمول أم من الحديد أو النحاس القوي أو الصفر أو الخشب القوي حيل ( الغرض منه طحن الحبوب ويخليها على كيفك خصوصاً ذاك الصوت العدل اللي تسمعه وأنت قاعد تضرب بيد الهاون داخله . الصوت يرنع ويعطيك نغمه حلوه .

- يرنع
** صوت قوي يدخل إلي قلبك قبل أذانك ( إذا قال لك واحد صوتك يرنع في قلبي ( يعني صوتك دخل قلبه وهو مرتاح حتى وأنت قاعد تصوت بالقوه ) .

- المصخنه ( المسخنه )
** غرشة وجيك أهل الأول لشرب الماي ولا تحتاج حق ثلاجه معمولة من الخزف . بس عبها ماي وخل الهوا يطقها وخذ اشرب ... تشرب ماي السلسبيل إن شاء الله .

- البشتخته
** صنوق من الخشب يحطون فيه قوري ( غوري ) الجاي ( الشاي ) مع أغراضه من صحون وستكانات وكماش ( ملاعق ) .

- صاير الباب
** ورا ولا جنب الباب .

- الحوي** الصاله المفتوحه اللي مالها سقف .

- تنبه
** يعني الكوره ( كرة القدم ) .

- ميرنّددا
** يعني ميرندا

- العاير** الزاويه ( القرنه )
*** مثال / شفت هالعاير اللي هناك هذا يمه اللي يبع الفصفص الشمسي ( يعني الزاويه أو النافذ ) .

- الفصفص
** الحب ( شمسي - دمامي - مفتوح ....الخ ) .

- المنسف** مشخل أهل الأول . يشخلون به العيش ( الرز ) وغيره عن الوصخ اللي فيه .

- الزبيل** بآلدي من الجلد له أذان عشان يشيلونه ابهم .

- جذب** وهو قلب النخله طعمه ولا أحلى منه لونه أبيض مصافر بس أنه غالي شوي .

- دويج
** يعني صوص الدجاج .

- القاري
** اهيا العربانه اللي تجرها الحماره ( والقارين بكرامه ) لها كفرات مثل السيارة .

الدباية : أي شي يدبي أي يزحف و يتحرك بس حجمة صغير مثل الدود أو النمل بستثناء ( بعض فرجان البحرين ودواسر البحرين عندهم الدباية هو القلاب مال الرمل )

[المتمكن]

وهذي بعض كلمات من لهجتنا المحلية اتمنى ان تعجبكم :

سوي دلال

معناها / اضفري شعرك ضفيرة واحدة

كيف القحم

معناها /

كيف حال الوالد

اصبحتم

معناها / صباح الخير

امسيتم

معناها / مساء الخير

عين لي - تشبح لي

معناها / انظر لي

اوفى

معناها / اوف

وانتظروا القادم احلى

[نوارس]

وأنت أحلى يالمتمكن


هذا الشغل العدل
يالله خل نستفيد من بعضنا البعض
ونكون الموسوعة للهجات السعودية في هذا الصرح الكبير

اتمنى من الجميع المشاركة الفاعلة لتعم الفائدة

وياليت كل واحد يحط منطقته أو محافظته لتعم الفائدة أكثر وأكثر

يالله خل ننمي السياحة في بلدنا بتعريف الكل بجميع لهجاتنا ( تنفع ترى )

مشكور يالغالي على هذه المداخلة الجميلة والرائعة