قصة وقصيدة جميلة جدا [الأرشيف] - منتديات الامام الغزالي التعليمية

نايف العذل

2 - 12 - 2007, 08:52 PM

هذه قصة ومعها قصيدة سوف اضعها بين ايديكم لعلها ترووووووووووووووق لمسامعكم وسوف يكون لي قصة بعد كل فترة ولكن بسب الاشغال ربما انني اتأخر فالعذر للجميع

فية ولد اسمه نوار وعمره 10 سنوات
والاب اسمه معتق بن نوار
والاب له بنت اسمها مزنه . وماله احد غيرهم ومزنه شاعره بعد

الاب لما زارهم خال العيال اهداه حر سباق . فكان الاب متحسف وقال لولده :
لو اني عطيت خاله قعود اقل شوي من هالطيب . فقال الولد ليه يا ابوي انت متحسف
فقال لا بس اسمع هالبيتين .
يا ولد خالك زارنا والله اعطاه ***** اعطاه حر(ن) كيف احصل بديله

فرد الولد

انته عطيت بعير موذيك برغاه ***** وخالي عطاك ام العيون الكحيله

وبعدها جاهم شخصين يخطبون مزنه .

واحد فقير وما عنده شي لكن رجال . وواحد غني لكن بخيل

فقال الاب
ان كان يا مزنه تبين الستيره ***** عليك باللي يحفظ الابل والضان

قالت مزنه
يابوي بعض المال كثره معيره ***** والفقر ما عيب ذريبين الايمان

قال الاب
طير(ن) بلا جنحان صعب(ن) مطيره ***** وكثر الحلال يصير للرجل جنحان

قالت مزنه
الرجل باكر للمقابر مصيره ***** ما ينفعه ماله اذا جات الاكفان

قال نوار(الابن)
يابوي كان ان الولد تستشيره ***** والله ما يقرب نسبنا رديان

قال الاب
يابوك انا حاسب(ن) ضانه كثيره ***** فيها حليب وصوف وتجيب طليان

قالت مزنه
ضانه عساها للسباع المغيره ***** مادام ضيف الله يخليه وجبان

قال الاب
مادام هذا الراي فيه الف خيره ***** وانا موافقكم على كل ما كان

وتزوجها الفقير واغناه الله بسببها